ಭಾರತದ ಸ್ವಾತಂತ್ರ್ಯಕ್ಕಾಗಿ ಹಲವು ಸ್ತರಗಳಲ್ಲಿ, ಹಲವು ಮಜಲುಗಳಲ್ಲಿ ಹೋರಾಟ ನಡೆದಿದೆ. ಅಸಂಖ್ಯ ದೇಶಪ್ರೇಮಿಗಳು ತಮ್ಮ ತಮ್ಮ ಮಿತಿ ಹಾಗೂ ವ್ಯಾಪ್ತಿಯಲ್ಲಿ ಹೋರಾಡಿ, ಅತ್ಯಂತಿಕ ತ್ಯಾಗ-ಬಲಿದಾನಗಳನ್ನು ಮಾಡಿದ್ದಾರೆ. ಸಾಮ್ರಾಜ್ಯಶಾಹಿ ಆಡಳಿತವನ್ನು ಎದುರಿಸಲು ವೈಯಕ್ತಿಕ ನೆಲೆಯಲ್ಲಿ ನಡೆದ ಇಂತಹ ಸಣ್ಣ-ಪುಟ್ಟ ಪ್ರತಿರೋಧಗಳೇ ಮಹತ್ತರ ಭೂಮಿಕೆಯನ್ನು ರೂಪಿಸಿದವು. ಹನಿ ಹನಿ ಕೂಡಿಯೇ ಪ್ರವಾಹವಾಗುವಂತೆ, ಸಾಮಾನ್ಯ ಸ್ವಾತಂತ್ರ್ಯ ಹೋರಾಟಗಾರರು ನಡೆಸಿದ ಹೋರಾಟವೇ ಕ್ರಮೇಣ ಬ್ರಿಟಿಷರನ್ನು ಹೊಡೆದೋಡಿಸಿದ ಹೆದ್ದಾರಿಯಾಯಿತು. ಈ ಕೃತಿಯಲ್ಲಿ ಪರಿಚಯಿಸಲ್ಪಟ್ಟಿರುವ ಪ್ರತಿಯೊಬ್ಬ ಸ್ವಾತಂತ್ರ್ಯಯೋಧನೂ ಅಮರಸೇನಾನಿಯಾಗಿ ಕಂಗೊಳಿಸುತ್ತಾನೆ. ಸ್ವಾತಂತ್ರ್ಯಕ್ಕಾಗಿ ನಮ್ಮ ಹಿರಿಯರು ತೆತ್ತ ಹಾಗೂ ಅದನ್ನು ಉಳಿಸಿಕೊಳ್ಳುವುದಕ್ಕಾಗಿ ನಾವು ತರಬೇಕಾದ ‘ಬೆಲೆ’ ಏನು ಎಂಬುದರ ಸ್ಪಷ್ಟ ಅರಿವನ್ನು ಈ ಪುಸ್ತಕ ಮೂಡಿಸುತ್ತದೆ.