ಯೋಗಿ ಅಗ್ನಿಪಥ – ರವೀಂದ್ರ ಜೋಶಿ | Yogi Agnipatha Kannada Book

ಮಾಫಿಯಾ ಸಾಮ್ರಾಜ್ಯದ ಪತನ ಮತ್ತು ಕಾವಿಧಾರಿ ಸನ್ಯಾಸಿಯ ಆಡಳಿತದ ಅಸಲಿ ಕಥೆ!

ರಕ್ತ ಮತ್ತು ಗನ್‌ಪೌಡರ್‌ನ ಘಾಟು ವಾಸನೆ ಹೊಡೆಯುವ ಉತ್ತರ ಪ್ರದೇಶದ ಆ ಕರಾಳ ಗಲ್ಲಿಗಳಲ್ಲಿ, ದಶಕಗಳಿಂದ ಮಾಫಿಯಾ ದೊರೆಗಳು ಬರೆದದ್ದು ಕೇವಲ ಅಮಾಯಕರ ಮರಣ ಶಾಸನವನ್ನು ಮಾತ್ರ. ಅಲ್ಲಿ ಕಾನೂನು ಬೆತ್ತಲಾಗಿ ನಿಂತಿತ್ತು, ಖಾಕಿ ಪಡೆ ಗೂಂಡಾಗಳ ಕಾಲಬುಡದಲ್ಲಿ ಜೀ ಹುಜೂ‌ರ್ ಎನ್ನುತ್ತಿತ್ತು. ಆದರೆ… ಯಾವಾಗ ಲಖನೌದ ಆ ಐದನೇ ಮಹಡಿಯ ಸಿಂಹಾಸನದ ಮೇಲೆ ಒಬ್ಬ ಕೇಸರಿಧಾರಿ ಸನ್ಯಾಸಿ ಬಂದು ಕುಳಿತನೋ, ಇಡೀ ಅಂಡರ್‌ವರ್ಲ್ಡ್‌ನ ಜಾತಕದ ಮೇಲೆ ಶನಿಯ ವಕ್ರದೃಷ್ಟಿ ಬಿತ್ತು!

ಬುಲ್ಡೋಜರ್‌ಗಳ ಗರ್ಜನೆ ಮತ್ತು ಎನ್‌ಕೌಂಟರ್‌ಗಳ ನಡುಕ

ಠಾಣೆಯೊಳಗೇ ಮಂತ್ರಿಯನ್ನು ಕಟುಕರಂತೆ ಕತ್ತರಿಸಿದ ವಿಕಾಸ್ ದುಬೆ ಹೆದ್ದಾರಿಯ ಹೆಣವಾದರೆ, 11 ಸಾವಿರ ಕೋಟಿಯ ಅಹಂಕಾರದ ದೊರೆ ಅತೀಕ್ ಅಹ್ಮದ್ ಕೇವಲ ಸೆಕೆಂಡುಗಳಲ್ಲಿ ಬುಲೆಟ್ ಸದ್ದಿಗೆ ಕರಗಿಹೋದ. ಇದು ಯೋಗಿ ಆದಿತ್ಯನಾಥ್ ಎಂಬ ಕಠಿಣ ಆಡಳಿತಗಾರ, ರಕ್ತದಿಂದ ಕಟ್ಟಿದ ಮಾಫಿಯಾ ಸಾಮ್ರಾಜ್ಯಗಳನ್ನು ಹಳದಿ ಬುಲ್ಡೋಜರ್‌ಗಳ ಮತ್ತು ಎನ್‌ಕೌಂಟರ್‌ಗಳ ಮೂಲಕ ಧೂಳೀಪಟ ಮಾಡಿದ ಅಸಲಿ ರಕ್ತಚರಿತ್ರೆ!

ಕಾವಿ ಮತ್ತು ಖಾಕಿಯ ನಡುವಿನ ಅಚ್ಚರಿಯ ಸಂಬಂಧ

ಯೋಗಿಯೆಂಬುವರ ಕಥೆ ಕೇವಲ ಮಾಫಿಯಾ ದಮನಕ್ಕೆ ಮಾತ್ರ ಮುಗೀತು ಅಂದುಕೊಂಡ್ರೆ ಅದು ನಮ್ಮ ಭ್ರಮೆ. ಈ ರಾಜಕೀಯವೆಂಬ ಚದುರಂಗದಲ್ಲಿ ಯೋಗಿಯೆಂಬ ಪಾತ್ರ ಬಹಳ ಮಹತ್ವದ್ದು. ಸನ್ಯಾಸತ್ವದ ಕಾವಿಗೂ, ಆಡಳಿತದ ಖಾಕಿಗೂ ಎಲ್ಲಿಂದೆಲ್ಲಿಯ ಸಂಬಂಧ? ಆ ಸಲ್ಲದ ಸಂಬಂಧವನ್ನೇ ಒಲಿಸಿಕೊಂಡು, ಅಪರಾಧಗಳ ತಾಣವಾಗಿದ್ದ ಯುಪಿಯನ್ನು ಇಂದು ಜಾಗತಿಕ ಮಟ್ಟದಲ್ಲಿ ತಂದು ನಿಲ್ಲಿಸಿದ, ಅಭಿವೃದ್ಧಿಯ ಪಥದಲ್ಲಿ ಮುನ್ನಡೆಸಿದ ಶ್ರೇಯಸ್ಸು ಯೋಗಿ ಆದಿತ್ಯನಾಥ್ ಅವರದು.

ಲೇಖಕ ರವೀಂದ್ರ ಜೋಶಿ ಅವರು ಪ್ರತಿಯೊಂದು ಘಟನೆಯನ್ನೂ ಅತ್ಯಂತ ರೋಚಕವಾಗಿ, ಓದುಗನನ್ನು ಕುರ್ಚಿಯ ತುದಿಗೆ ತಂದು ಕೂರಿಸುವಂತೆ ಈ ಕೃತಿಯಲ್ಲಿ ಕಟ್ಟಿಕೊಟ್ಟಿದ್ದಾರೆ. ಓದುತ್ತಾ ಹೋದಂತೆ ಯೋಗಿಯವರ ದಿಟ್ಟತನದ ಬಗ್ಗೆ ಅಚ್ಚರಿ, ಅಭಿಮಾನ ಮತ್ತು ರೋಮಾಂಚನ ಮೂಡುವುದು ಖಂಡಿತ.