ಬ್ಲೇಝ್: ಮಗನೊಬ್ಬನ ಅಗ್ನಿದಿವ್ಯ (ಒಂದು ಸತ್ಯಕಥೆ) – Blaze Kannada Book by Nidhi Poddar & Sushil Poddar

ಅಗಾಧ ಕೆಚ್ಚಿನಿಂದ ಉದ್ಭವಿಸಿದ ಜೀವನಯಾನ

ಆರೋಗ್ಯದ ನಿಜವಾದ ಬೆಲೆ ಅರಿವಾಗುವುದು ಅದು ನಮ್ಮಿಂದ ದೂರವಾದಾಗಲೇ. ಕ್ಯಾನ್ಸರ್ ಎಂಬುದು ಕೇವಲ ದೈಹಿಕ ಕಾಯಿಲೆಯಲ್ಲ, ಅದು ರೋಗಿ ಮತ್ತು ಅವರ ಕುಟುಂಬವನ್ನು ಭಾವನಾತ್ಮಕವಾಗಿ ಜರ್ಜರಿತಗೊಳಿಸುವ ಬಹುದೊಡ್ಡ ಸವಾಲು. ರೋಗಿಯನ್ನು ಕೇವಲ ‘ಗುಣವಾಗುವ’ ಅಥವಾ ‘ಚೇತರಿಕೆಯ’ ಸಂಕುಚಿತ ದೃಷ್ಟಿಯಿಂದ ನೋಡುವ ಸಮಾಜದ ನಡುವೆ, ಆ ಪ್ರತಿಕೂಲ ಪರಿಸ್ಥಿತಿಯನ್ನೇ ಆತ್ಮವಿಕಾಸದ ಸಾಧನವಾಗಿ ಬದಲಾಯಿಸುವ ಛಲ ಎಲ್ಲರಿಗೂ ಒಲಿಯುವುದಿಲ್ಲ.

“ಬ್ಲೇಝ್: ಮಗನೊಬ್ಬನ ಅಗ್ನಿದಿವ್ಯ” ಅಂತಹ ಅಪರೂಪದ, ಅಗಾಧ ಕೆಚ್ಚಿನಿಂದ ಉದ್ಭವಿಸಿದ ನೈಜ ಕಥನ. ಇದು ದಿವ್ಯಾಂಶ್ ಆತ್ಮನ್ ಎಂಬ ಯುವಕನ ಸ್ಫೂರ್ತಿದಾಯಕ ಬದುಕಿನ ಪಯಣ. ಸುದೀರ್ಘ ಕಾಲ ಕ್ಯಾನ್ಸರ್ ವಿರುದ್ಧ ಹೋರಾಡುತ್ತಲೇ, ಸಾವಿಗಿಂತ ಮುನ್ನ ಭರವಸೆ ಕಳೆದುಕೊಳ್ಳುವ ರೋಗಿಗಳ ವಿಷವರ್ತುಲವನ್ನು ಮುರಿದು, ಮನುಷ್ಯನ ಚೇತನದ ಗೆಲುವನ್ನು ಸಾರಿದ ದಿವ್ಯಾಂಶ್‌ನ ಕಥೆಯನ್ನು ಆತನ ತಾಯಿ ನಿಧಿ ಪೋದಾರ್ ಹಾಗೂ ತಂದೆ ಸುಶೀಲ್ ಪೋದಾರ್ ಅವರು ಇಲ್ಲಿ ಅತ್ಯಂತ ಭಾವುಕವಾಗಿ ಹಾಗೂ ಆಪ್ತವಾಗಿ ಕಟ್ಟಿಕೊಟ್ಟಿದ್ದಾರೆ.

“ನಾನು ಈ ಹಾದಿಯ ಕಡಿದಾದ ಅಂಚಿನಲ್ಲಿ ನಿಂತಾಗ, ಎಂದೆಂದಿಗೂ ಇದ್ದೇ ಇರುವ, ಕ್ಷಣಭಂಗುರತೆಯ ನಿಜಸ್ವರೂಪದ ಅರ್ಥ ನನಗೆ ದಿಟವಾಗಿ ಆಗುತ್ತದೆ” ಎಂಬ ಅವನದೇ ‘ಮರುಹುಟ್ಟು’ ಕವನದ ಸಾಲುಗಳು ಅವನೊಳಗಿನ ಪ್ರಬುದ್ಧತೆಯನ್ನು ಮತ್ತು ವಾಸ್ತವದ ಅರಿವನ್ನು ಎತ್ತಿತೋರಿಸುತ್ತವೆ.

ಕೇವಲ ಕಣ್ಣೀರಿನ ಕಥೆಯಾಗದೆ, ಧೈರ್ಯ ಮತ್ತು ಮನೋದಾರ್ಢ್ಯದ ಮೂರ್ತರೂಪವಾಗಿ ನಿಲ್ಲುವ ಈ ಕೃತಿ, ಪ್ರತಿಯೊಬ್ಬರಿಗೂ ಜೀವನದ ಬಗ್ಗೆ ಹೊಸ ಭರವಸೆಯನ್ನು ನೀಡುತ್ತದೆ. ಸಾಹಿತ್ಯಾಸಕ್ತರಿಗೆ ಮತ್ತು ಜೀವನೋತ್ಸಾಹವನ್ನು ಇಮ್ಮಡಿಗೊಳಿಸಿಕೊಳ್ಳಲು ಬಯಸುವವರಿಗೆ ಇದೊಂದು ಅತ್ಯಮೂಲ್ಯ ಓದು.