ರಾಮಾಯಣ ಮತ್ತು ಭಾರತದ ಮಹಾಪುರುಷರು | Ramayana mattu Bharatada Mahapurusharu | ಶ್ರೀ ದೇವುಡು ನರಸಿಂಹಶಾಸ್ತ್ರಿ

ನಮ್ಮ ಭಾರತೀಯ ಸಂಸ್ಕೃತಿಯ ಮಹಾವೃಕ್ಷಗಳಾದ ರಾಮಾಯಣ ಮತ್ತು ಮಹಾಭಾರತ ಗ್ರಂಥಗಳ ಆಳವಾದ ಒಳನೋಟವನ್ನು ನೀಡುವ ‘ರಾಮಾಯಣ ಮತ್ತು ಭಾರತದ ಮಹಾಪುರುಷರು’ ಕೃತಿಯು ದಿಗ್ಗಜ ಲೇಖಕ ಶ್ರೀ ದೇವುಡು ನರಸಿಂಹಶಾಸ್ತ್ರಿ ಅವರ ಅದ್ಭುತ ಕೊಡುಗೆಯಾಗಿದೆ. ಇದರಲ್ಲಿ ಅವರ ಪ್ರಸಿದ್ಧ ‘ರಾಮಾಯಣದ ಮಹಾಪುರುಷರು’, ‘ಭಾರತದ ಮಹಾಪುರುಷರು’ ಹಾಗೂ ಅಪರೂಪದ ‘ರಾಮಾಯಣವೂ ಭಗವದ್ಗೀತೆಯೂ’ ಎಂಬ ಮೂರು ಕೃತಿಗಳನ್ನು ಒಂದೇ ಗ್ರಂಥದಲ್ಲಿ ಸುಂದರವಾಗಿ ಸಂಯೋಜಿಸಲಾಗಿದೆ. ನಿರಂತರ ಪ್ರಕಾಶನ ಹೊರತಂದಿರುವ ಈ ಕನ್ನಡ ಕೃತಿಯನ್ನು ಹಿರಿಯ ವಿದ್ವಾಂಸರಾದ ಡಾ. ಶಾಸ್ತ್ರೀಚೂಡಾಮಣಿ ಪ್ರೊ. ಮಲ್ಲೇಪುರಂ ಜಿ. ವೆಂಕಟೇಶ ಅವರು ಆಮೂಲಾಗ್ರವಾಗಿ ಪರಿಷ್ಕರಿಸಿ, ಮೂಲ ಶ್ಲೋಕಗಳ ನಿಖರ ಅಡಿಟಿಪ್ಪಣಿಗಳೊಂದಿಗೆ ಅತ್ಯಂತ ಅಚ್ಚುಕಟ್ಟಾಗಿ ಸಂಪಾದಿಸಿದ್ದಾರೆ.

ರಾಮಾಯಣ ಸಾಗಿ ಬಂದ ಹಾದಿ

ರಾಮಾಯಣದ ಕಥೆಯು ಸರಯೂ ತೀರದಲ್ಲಿ ಆರಂಭವಾಗಿ, ಬ್ರಹ್ಮಪುತ್ರಾ ಗಂಗಾನದಿಗಳ ಇಕ್ಕೆಲದಲ್ಲಿರುವ ಆಶ್ರಮಗಳು, ರಾಜಧಾನಿಗಳು ಮೊದಲಾದವುಗಳ ಕಥೆಯನ್ನೆಲ್ಲ ಹೇಳಿಕೊಂಡು ತೆಂಕಲಾಗಿ ಹೊರಟು ಚಿತ್ರಕೂಟ ದಂಡಕಾರಣ್ಯ ಜನಸ್ಥಾನ ಪಂಚವಟಿ ಪಂಪಾ ಕಿಂಧಾ ಇವುಗಳ ಮಾರ್ಗವಾಗಿ ಲಂಕೆಯ ವರೆಗೂ ಹೋಗಿ ಮತ್ತೆ ಪೂರ್ವಸ್ಥಾನವನ್ನು ಸೇರುವ ವಿಸ್ತಾರವಾದ ಯಾತ್ರೆಯ ವರದಿಯೆನ್ನ ಬಹುದು. ಅಂತೂ ರಾಮಾಯಣದಲ್ಲಿ ಉತ್ತರದೇಶದಲ್ಲಿ ಪ್ರಸಿದ್ಧವಾದ ಇಕ್ಷಾಕು ಗಾಧಿ ಮೊದಲಾದ ರಾಜವಂಶಗಳ, ಗೌತಮ ವಸಿಷ್ಠ ಭಾರದ್ವಾಜಾದಿ ಋಷಿಗಳ, ಚಿತ್ರಕೂಟಾದಿ ಪ್ರಸಿದ್ಧ ಕ್ಷೇತ್ರಗಳ ಕಥೆಗಳಿವೆ. ಹಾಗೆಯೇ ದಕ್ಷಿಣದಲ್ಲಿ ಪ್ರಸಿದ್ಧವಾಗಿದ್ದ ವಾನರ ರಾಜ್ಯ, ಅಲ್ಲಿಂದಲೂ ತೆಂಕಲಾಗಿದ್ದ ಲಂಕಾರಾಜ್ಯದ ವಿಸ್ತಾರವಾದ ವರ್ಣನೆಗಳಿವೆ.

ರಾಮಾಯಣ–ಮಹಾಭಾರತ ಪಾತ್ರಗಳ ವಿಶ್ಲೇಷಣೆ

ನಮ್ಮ ಸಂಸ್ಕೃತಿಯನ್ನು ರೂಪಿಸಿದ ತ್ರೇತಾಯುಗದ ಶ್ರೀರಾಮಚಂದ್ರನು ಒಂದು ಕಡೆಯಾದರೆ; ದ್ವಾಪರಯುಗದ ಶ್ರೀಕೃಷ್ಣ ಮತ್ತೊಂದೆಡೆ. ಇವರಿಬ್ಬರೂ ದೇವುಡು ಅವರ ಮನಸ್ಸನ್ನು ತಟ್ಟಿರುವುದುಂಟು. ಇದರ ಫಲವಾಗಿ ರಾಮಾಯಣದಲ್ಲಿ ಬರುವ ಮಹಾಪುರುಷರನ್ನೂ ಮಹಾಭಾರತದಲ್ಲಿ ಬರುವ ಮಹಾಪುರುಷರನ್ನೂ ಕುರಿತು ವಿಶ್ಲೇಷಣಾತ್ಮಕ ಬರೆಹಗಳನ್ನು ಬಿಡಿಬಿಡಿಯಾಗಿ ಬರೆದರು. ಭಗವದ್‌ಗೀತೆಯಲ್ಲಿ ಹೇಳಿರುವ ದೈವೀಗುಣವನ್ನು ಹೊಂದಿರುವ ವ್ಯಕ್ತಿಗಳ ಬಗೆಗೂ ಅವರು ಬರೆದರು. ರಾಮ, ರಾವಣ, ಸೀತೆ, ಮಂಡೋದರಿ, ವಿಭೀಷಣ, ಆಂಜನೇಯ, ದಶರಥ, ಕೈಕಯೀ, ಋಷ್ಯಶೃಂಗ, ವಿಶ್ವಾಮಿತ್ರ, ವಿಭೀಷಣ, ಇಂದ್ರಜಿತ್ತು ಮುಂತಾದ ಪಾತ್ರಗಳ ವಿಶ್ಲೇಷಣೆಯನ್ನು ದೇವುಡು ರಾಮಾಯಣ ಕಥಾನಕದ ಹಿನ್ನೆಲೆಯಲ್ಲಿ ಬರೆದಿದ್ದರೆ; ಅದರಂತೆ ಭಾರತದ ವ್ಯಾಸ, ಶುಕ, ಶಂತನು, ಭೀಷ್ಮ, ಪಾಂಡವ, ಧೃತರಾಷ್ಟ್ರ, ಪುರೂರವ, ನಹುಷ, ಯಯಾತಿ, ಶ್ರೀಕೃಷ್ಣ ಮುಂತಾದವರ ಬಗೆಗೆ ಅಪೂರ್ವ ಒಳಪುಟವುಳ್ಳ ಬಿಡಿಬಿಡಿಯಾದ ಲೇಖನಗಳನ್ನು ಬರೆದರು. ದೇವುಡು ಅವರು ಆಯಾಮ ಪಾತ್ರಗಳ ಆಳವಾದ ವಿಶ್ಲೇಷಣೆಯನ್ನು ಮಾಡಿಕೊಟ್ಟಿದ್ದಾರೆಂಬುದು ಇಲ್ಲಿಯ ವಿಶೇಷ.