ನಮ್ಮ ಆಚಾರ-ವಿಚಾರಗಳು: ಆತ್ಮಶಕ್ತಿಸಂವರ್ಧಕ, ಸಂಸ್ಕೃತಿಸಂಪೋಷಕ | Namma Achara Vicharagalu by Dr. A. Madhava Udupa

‘ಇಷ್ಟು ವರ್ಷಗಳಿಂದ ಗಣೇಶದೇವರ ಮೂರ್ತಿಯನ್ನು ಸ್ಥಾಪಿಸಿ ಗಣೇಶಚೌತಿಯನ್ನು ಅದ್ದೂರಿಯಾಗಿ ಆಚರಿಸಿದರೂ ಗಣೇಶದೇವರು ಕಣ್ಣಿರದೇ ಇಲ್ಲ ಎನಿಸುತ್ತದೆ’, ‘ನವರಾತ್ರಿಯಲ್ಲಿ ದುರ್ಗೆಯನ್ನು ವರ್ಷವರ್ಷವೂ ಪೂಜಿಸುತ್ತ ಬಂದರೂ ಆಕೆಗೆ ನನ್ನ ಮೊರೆ ಕೇಳಿಸಿಯೇ ಇಲ್ಲ ಎಂದನಿಸುತ್ತದೆ’…ಎಂದೆಲ್ಲ ತಮ್ಮ ಅಳಲನ್ನು ತೋಡಿಕೊಳ್ಳುವವರಿದ್ದಾರೆ. ಅಂಥವರ ಆತಂಕದ ಕತ್ತಲನ್ನು ನೀಗಿಸುವ ಬೆಳಕನ್ನು ಗುರುದೇವ ಶ್ರೀರಾಮಕೃಷ್ಣ ಪರಮಹಂಸರು ಹೇಳುತ್ತಿದ್ದ ದೃಷ್ಟಾಂತಕಥೆ ಹಲಸಬಲ್ಲದು. ಆ ಕಥೆಯಲ್ಲಿ ಒಂದು ಹುಣ್ಣಿಮೆಯ ರಾತ್ರಿ ಒಂದಷ್ಟು ಜನ ಬೆಸ್ತರು ಕಂಠಪೂರ್ತಿಕುಡಿದು ಒಂದು ದೋಣಿಯನ್ನೇರಿದರು. ದೂರದಲ್ಲಿನ ದ್ವೀಪಕ್ಕೆ ಹೋಗುವ ಇರಾದೆಯಿಂದ ಅವರೆಲ್ಲ ಒಂದೇ ಸವನೆ ತೊಳೆಹಾಕತೊಡಗಿದರು. ಕುಡಿದ ಅಮಲಿನಲ್ಲಿ ಅವರು ಬೆಳಗಿನಜಾವದ ವರೆಗೂ ತೊಳೆಹಾಕಿದ್ದೇ ಹಾಕಿದ್ದು. ಬೆಳಗಾಗುವ ಹೊತ್ತಿಗೆ ಅವರ ಮತ್ತು ಇಳಿದು ಅವರು ಕಣ್ಣುಜ್ಜಿ ನೋಡುತ್ತಾರೆ – ಏನಾಶ್ಚರ್ಯ! ದೂರದ ದ್ವೀಪದಲ್ಲಿ ಅವರಿರಲಿಲ್ಲ – ಅವರೆಲ್ಲ ಹೊರಟಲ್ಲೇ ಇದ್ದರು! ಇಡೀ ರಾತ್ರಿ ತೊಳೆಹಾಕಿದರೂ ಅದೇಕೆ ದೂರದ ದ್ವೀಪ ಸೇರಲಾಗಲಿಲ್ಲವೆಂದು ಅವರು ಬೆರಗಾಗಿ ನೋಡುತ್ತಾರೆ – ಆ ದೋಣಿಯನ್ನು ಗೂಟಕ್ಕೆ ಕಟ್ಟಿದ್ದ ಹಗ್ಗವನ್ನು ಅವರು ಬಿಡಿಸಿಯೇ ಇರಲಿಲ್ಲ! ಇಡೀ ರಾತ್ರಿ ತೊಳೆಹಾಕಿದರೂ ದೋಣಿ ಮುನ್ನಡೆಯಲೇ ಇಲ್ಲ ಎಂದೇನೋ ಅನಿಸಿದರೂ, ಸ್ವಲ್ಪ ವಿವೇಚಿಸಿದರೆ ತಿಳಿಯುತ್ತದೆ – ಗೂಟಕ್ಕೆ ಕಟ್ಟಿದ್ದ ಹಗ್ಗವನ್ನು ಬಿಡಿಸಿಕೊಳ್ಳದೆ ಇದ್ದುದೇ ಅದಕ್ಕೆ ಕಾರಣ ಎಂಬುದು. ಅದೇ ರೀತಿ ಇಷ್ಟು ವರ್ಷಗಳಿಂದ ಆರಾಧಿಸಿದರೂ ದೇವರ ಕೃಪೆಯಿನ್ನೂ ದೊರೆತಿಲ್ಲ ಎಂದು ಗೋಗರೆಯುವವರ ಆರಾಧನೆಯ ದೋಣಿ ದೇವರ ಕೃಪಾತೀರ ಸೇರದೆ ಇರಲೂ ಕಾರಣ ಆ ದೋಣಿ ಅಜ್ಞಾನ, ಅಶ್ರದ್ದೆ, ಅಹಂಕಾರಾದಿಗಳಿಂದ ಬದ್ಧವಾಗಿರುವುದೇ ಆಗಿದೆ.

ಆರಾಧನೆಗೆ ಮಾತ್ರ ಅಲ್ಲ, ನಮ್ಮೆಲ್ಲ ಆಚರಣೆಗಳಿಗೂ ಈ ಮಾತು ಅನ್ವಯಿಸುತ್ತದೆ. ಆ ಆಚರಣೆಗಳನ್ನು ವರ್ಷಾನುಗಟ್ಟಲೆ ಆಚರಿಸಿದರೂ ಫಲದಾಯಕ ಆಗದಿರಲು ಕಾರಣ ಅವುಗಳ ಅರ್ಥ ಅರಿತು ಆಚರಿಸದಿರುವುದೇ ಆಗಿದೆ. ಆದ್ದರಿಂದ ನಮ್ಮೆಲ್ಲ ಆರಾಧನೆ, ಆಚರಣೆಗಳೂ ಫಲದಾಯಕವಾಗಲು ನಾವು ಮಾಡಲೇ ಬೇಕಾದ್ದು ಒಂದೇ – ಆಚರಣೆಗಳ ಅರ್ಥ ಅರಿತು ಆಚರಿಸುವುದು. ಈ ಕೃತಿಯುದ್ದಕ್ಕೂ, ಅಂತರಗಂಗೆಯಂತೆ ಹರಿಯುತ್ತಿರುವುದು ಆ ಒಡಲಕರೆಯ ಹೊನಲೇ.

ಮನೆಮನೆಯಲ್ಲೂ ಇರಲಿ, ಮನಮನವನ್ನೂ ಬೆಳಗಲಿ !

‘ನಮ್ಮ ಆಚಾರ-ವಿಚಾರಗಳಿಗೆ, ಸಂಪ್ರದಾಯ-ಅನುಷ್ಠಾನಗಳಿಗೆ ಅರ್ಥತುಂಬುವ ಸಾರ್ಥಕ ಪ್ರಯತ್ನ ಇಲ್ಲಿ ನಡೆದಿದೆ. ಸಾರ್ಥಕ ಬದುಕಿಗೊಂದು ದಾರಿದೀಪವಾಗಿ ಈ ಕೃತಿ ಮೂಡಿಬಂದಿದೆ. ಎಲ್ಲರೂ ನಮ್ಮ ಸಾಂಸ್ಕೃತಿಕ ಪರಂಪರೆಯ ಬಗೆಗೆ ಇಂಥ ಚಿಂತನಕ್ರಮವನ್ನು ರೂಢಿಸಿಕೊಂಡರೆ ಎಲ್ಲರ ಬದುಕೂ ಅರ್ಥಪೂರ್ಣವಾಗುತ್ತದೆ; ಆನಂದಮಯವಾಗುತ್ತದೆ. ಅದರಿಂದ ಪ್ರಯತ್ನವೂ ಸಾರ್ಥಕವಾಗುತ್ತದೆ; ‘ಯದೇವ ವಿದ್ಯಯಾ ಕರೋತಿ…’ ಎಂಬ ಶ್ರುತಿಯ ಸಂದೇಶಕ್ಕೂ ಗೌರವ ಸಂದಂತಾಗುತ್ತದೆ. ಹಾಗಾಗಲಿ ಎಂದು ಹಾರಯಿಸುತ್ತ, ಡಾ|| ಉಡುಪರನ್ನು ಮನಃಪೂರ್ವಕವಾಗಿ ಹರಸುತ್ತೇನೆ.’ ಉಡುಪರ

ಡಾ|| ಬನ್ನಂಜೆ ಗೋವಿಂದಾಚಾರ್ಯ

ಈ ಸುಂದರ ಗ್ರಂಥದಲ್ಲಿ ಉಡುಪರು ಅನುದಿನದ ನಮ್ಮ ಬದುಕಿನಲ್ಲಿ ಪೂಜೆ, ಹಬ್ಬ, ಸಂಸ್ಕಾರಗಳಿಗೆ ಸಂಬಂಧಿಸಿದ ಆಚರಣೆಗಳ ಹಿಂದೆ ಇರುವ ತತ್ತ್ವದ ಕುರಿತು ಚಿಂತನ-ಮಂಥನ ನಡೆಸಿ ಜ್ಞಾನನವನೀತವನ್ನು ನಮಗೆ ಕೊಟ್ಟು ಮಹದುಪಕಾರ ಮಾಡಿದ್ದಾರೆ. ಅರ್ಥ ಅರಿತು ಆಚರಿಸುವ ಮೂಲಕ ಆಚರಣೆಗಳೆಲ್ಲ ಸಾರ್ಥಕವಾಗುವಂತಾಗಬೇಕೆಂಬ ಅನನ್ಯ ಕಾಳಜಿಯಿಂದ ಅವರು ರಚಿಸಿರುವ ಈ ಪುಸ್ತಕವು ಇದನ್ನೋದುವವರಿಗೂ ಅರ್ಥ ಅರಿತು ಆಚರಿಸಲು ಪ್ರೇರಕಶಕ್ತಿ ಆಗದಿರದು. ಕನ್ನಡದ ಜನತೆ ಈ ಕೃತಿಯನ್ನು ತುಂಬ ಪ್ರೀತಿಯಿಂದ ಸ್ವೀಕರಿಸುತ್ತಾರೆ ಎಂಬ ನಂಬಿಕೆ ನನ್ನದು.’

ಡಾ|| ಗುರುರಾಜ ಕರಜಗಿ

‘ಧಾರ್ಮಿಕ ವಿಚಾರಗಳಿಗೆ ಸಂಬಂಧಿಸಿ ನಮ್ಮಲ್ಲಿ ಅನೇಕ ವಿಕೃತಕಲ್ಪನೆಗಳೂ, ತಪ್ಪು ಭಾವನೆಗಳೂ ಬೇರೂರಿಕೊಂಡಿವೆ. ಅದೂ ಸಾಲದು ಎಂಬಂತೆ ವಿಕೃತಿಯನ್ನೇ ಹರಿಯಬಿಡುವವರೂ ಇತ್ತೀಚೆಗೆ ಹೆಚ್ಚಾಗುತ್ತಿದ್ದಾರೆ. ಇಂಥ ಸಂದರ್ಭದಲ್ಲಿ ಸದ್ಭಾವನೆ, ಸದ್ವಿಚಾರಗಳ ಸರ್ಚ್‌ ಲೈಟ್ ಅನ್ನು ಹರಿಸಿ ವಿವೇಕದ ದಾರಿ ತೋರುವವರ ಅಗತ್ಯ ತುಂಬ ಹೆಚ್ಚು. ಉಡುಪರು ಅಂಥವರ ಸಾಲಿಗೆ ಸೇರುವವರು. ಅವರ ಈ ಕೃತಿಯುದ್ದಕ್ಕೂ ಉಕ್ಕುತ್ತಿರುವ ಅರ್ಥ ಅರಿತು ಆಚರಿಸುವಂತಾಗಬೇಕೆಂಬ ಅನುಪಮ ಕಾಳಜಿಯು ಓದುಗರೆಲ್ಲರ ಮನವನ್ನು ಮುಟ್ಟಿತಟ್ಟಲಿ! ಇಂಥವೇ ಹತ್ತುಹಲವು ಕೃತಿರತ್ನಗಳು ಅವರಿಂದ ಬರಲಿ!’

ವಿಶ್ವೇಶ್ವರ ಭಟ್