ಜಮಗೋಡಿನ ಸುತ್ತ: ನಡೆದುಬಂದ ದಾರಿಯ ಅವಲೋಕನ – ಮನೋಹರ ನಾಯಕ

‘ನಾಡವರು’ ಕರ್ನಾಟಕದ ಕರಾವಳಿಯ ಮೂರ್ನಾಲ್ಕು ತಾಲೂಕುಗಳಲ್ಲಿ (ಪ್ರಮುಖವಾಗಿ ಉತ್ತರ ಕನ್ನಡ ಜಿಲ್ಲೆಯಲ್ಲಿ) ನೆಲೆಸಿರುವ ಒಂದು ವಿಶಿಷ್ಟ ಸಮುದಾಯ. ಸಂಖ್ಯೆಯಲ್ಲಿ ಕೇವಲ ನಲವತ್ತೊ, ಐವತ್ತೊ ಸಾವಿರದಷ್ಟೇ ಇದ್ದರೂ, ಸಾಂಸ್ಕೃತಿಕವಾಗಿ ಮತ್ತು ಶೈಕ್ಷಣಿಕವಾಗಿ ಈ ಸಮುದಾಯ ಅತ್ಯಂತ ಶ್ರೀಮಂತವಾಗಿದೆ. ಶತಮಾನಗಳ ಹಿಂದೆ ವಿವಿಧ ಸಂಸ್ಥಾನಗಳ ಸೇನೆಗಳಲ್ಲಿ ಶೌರ್ಯದಿಂದ ಕಾರ್ಯನಿರ್ವಹಿಸುತ್ತಿದ್ದ ನಾಡವರು, ಕಾಲಕ್ರಮೇಣ ಕೃಷಿಕರಾಗಿ ಭೂಮಿಯೊಂದಿಗೆ ಅವಿನಾಭಾವ ಸಂಬಂಧ ಬೆಳೆಸಿಕೊಂಡರು.

ಇಂದು ಈ ಸಮುದಾಯ ಜ್ಞಾನದೀವಿಗೆಯನ್ನು ಹಿಡಿದು ಬಹುತೇಕ ಶಿಕ್ಷಣಕ್ಷೇತ್ರದಲ್ಲಿ ಸಕ್ರಿಯವಾಗಿ ಕಾರ್ಯನಿರ್ವಹಿಸುತ್ತಿದೆ. ವಿಶೇಷವೆನಿಸುವ ಸಂಗತಿಯೆಂದರೆ, ಇಂದಿನ ನಾಡವರ ಹಲವು ಕುಟುಂಬಗಳಲ್ಲಿ ಮಕ್ಕಳನ್ನು ಹೊರತುಪಡಿಸಿ, ಉಳಿದವರೆಲ್ಲರೂ ಶಿಕ್ಷಕರಾಗಿದ್ದಾರೆ! ಇಂತಹ ಶ್ರಮಜೀವಿ ಹಾಗೂ ಜ್ಞಾನವಂತ ಸಣ್ಣ ಸಮುದಾಯದ ಸಾಂಸ್ಕೃತಿಕ, ಸಾಮಾಜಿಕ ಮತ್ತು ಐತಿಹಾಸಿಕ ದಾಖಲೆಯೇ ಲೇಖಕ ಮನೋಹರ ನಾಯಕ ಅವರ “ಜಮಗೋಡಿನ ಸುತ್ತ (ನಡೆದುಬಂದ ದಾರಿಯ ಅವಲೋಕನ)” ಕೃತಿ. ಕರಾವಳಿಯ ಇತಿಹಾಸ ಮತ್ತು ಸಮುದಾಯಗಳ ಅಧ್ಯಯನದಲ್ಲಿ ಆಸಕ್ತಿಯುಳ್ಳ ಪ್ರತಿಯೊಬ್ಬರೂ ಓದಲೇಬೇಕಾದ ಪುಸ್ತಕವಿದು.