Karantara Suliyalli Kannada Book | ಕಾರಂತರ ಸುಳಿಯಲ್ಲಿ | Life of Dr. Shivarama Karanth

ಹೆಸರು: ಕಾರಂತರ ಸುಳಿಯಲ್ಲಿ
ಲೇಖಕರು: ಉಲ್ಲಾಸ ಕಾರಂತ, ಮಾಲವಿಕಾ ಕಪೂರ, ಕ್ಷಮಾ ರಾವ್‌
ಕನ್ನಡಕ್ಕೆ: ವಿಶ್ವೇಶ್ವರ ಭಟ್‌

ಡಾ. ಶಿವರಾಮ ಕಾರಂತರು ಕನ್ನಡ ಸಾಹಿತ್ಯ ಲೋಕದ ‘ನಡೆದಾಡುವ ವಿಶ್ವಕೋಶ’. ಅವರ ವ್ಯಕ್ತಿತ್ವ, ಶಿಸ್ತು ಮತ್ತು ವೈಚಾರಿಕತೆ ಎಂಥವರನ್ನೂ ಬೆರಗುಗೊಳಿಸುವಂಥದ್ದು. ಆದರೆ, ಒಬ್ಬ ಅಸಾಮಾನ್ಯ ಪ್ರತಿಭೆಯ ನೆರಳಿನಲ್ಲಿ ಬೆಳೆಯುವ ಮಕ್ಕಳ ಅನುಭವ ಹೇಗಿರುತ್ತದೆ? ಈ ಕುತೂಹಲಕ್ಕೆ ಉತ್ತರವೇ ಅವರ ಮೂವರು ಮಕ್ಕಳಾದ ಮಾಲವಿಕಾ ಕಪೂರ, ಉಲ್ಲಾಸ ಕಾರಂತ ಮತ್ತು ಕ್ಷಮಾ ರಾವ್ ಸೇರಿ ಬರೆದ ‘Growing Up Karanth’ ಪುಸ್ತಕ.
ಶಿವರಾಮ ಕಾರಂತರೆಂಬ ಆಲದ ಮರದ ಕೆಳಗೆ ಬೆಳೆದ ಮೂರು ಗಿಡಗಳು, ಆ ಮರದ ನೆರಳು ಮತ್ತು ಬೇರುಗಳೊಂದಿಗೆ ಬೆಳೆಯುತ್ತಾ ತಮ್ಮ ನೆನಪು, ಅನುಭವಗಳನ್ನು ಹೇಳಿದರೆ ಹೇಗಿರುತ್ತದೆ?
‘ಕಾರಂತರ ಸುಳಿಯಲ್ಲಿ’ ಕೃತಿ ಅಂಥದ್ದೇ ಒಂದು ಅಪರೂಪದ ಕಥನ. ಇದನ್ನು ಓದುವುದೆಂದರೆ ಕಾರಂತರ ‘ಬಾಲವನ’ದ ಅಂಗಳದಲ್ಲಿ ಅಡ್ಡಾಡಿದಂತೆ, ಅಲ್ಲಿನ ಮಣ್ಣಿನ ವಾಸನೆ, ಹಳೆಯ ಪುಸ್ತಕಗಳ ಘಮ ಮತ್ತು ಕಾರಂತರ ಶಿಸ್ತಿನ ಹೆಜ್ಜೆಗುರುತುಗಳನ್ನು ಪತ್ತೆ ಹಚ್ಚಿದಂತೆ. ಕಾರಂತರೆಂದರೆ ನಮಗೆಲ್ಲ ನೆನಪಾಗುವುದು ಆ ಧೀಮಂತ ವ್ಯಕ್ತಿತ್ವ, ಬಿಳಿ ಜುಬ್ಬಾ ಮತ್ತು ಉನ್ನತ ವೈಚಾರಿಕತೆ. ಆದರೆ ಅವರ ಮೂವರು ಮಕ್ಕಳ ಪಾಲಿಗೆ ಅವರು ಕೇವಲ ‘ಖ್ಯಾತ ಸಾಹಿತಿ’ ಅಷ್ಟೇ ಆಗಿರಲಿಲ್ಲ. ಬದಲಿಗೆ ಮನೆಯೊಳಗೆ ಆವರಿಸಿಕೊಂಡಿದ್ದ ಒಂದು ನಿಗೂಢ, ಶಿಸ್ತಿನ ಮತ್ತು ಪ್ರೀತಿಯ ‘ಅಪ್ಪ’ ಕೂಡ ಆಗಿದ್ದರು. ಈ ಪುಸ್ತಕ ಆ ಅಪ್ಪನ ಆಪ್ತ ಕಥೆ!
ಒಬ್ಬ ತಂದೆಯಾಗಿ ಕಾರಂತರು ಹೇಗಿದ್ದರು ಎಂಬುದನ್ನು ಅವರ ಮಕ್ಕಳ ಕಣ್ಣಿನಿಂದ ನೋಡುವ ಅಪರೂಪದ ಪ್ರಯತ್ನವಿದು. ಕಾರಂತರು ತಮ್ಮ ‘ಹುಚ್ಚು ಮನಸ್ಸಿನ ಹತ್ತು ಮುಖಗಳಲ್ಲಿ’, ‘ಸ್ಮೃತಿಪಟಲದಿಂದ (1, 2, 3)’ ಕೃತಿಗಳಲ್ಲಿ ತಮ್ಮನ್ನು ತಾವೇ ತೆರೆದುಕೊಂಡಿದ್ದಾರೆ. ಆದರೆ ‘ಕಾರಂತರ ಸುಳಿಯಲ್ಲಿ’ ಅವರ ಮಕ್ಕಳು ತಮ್ಮ ಬಾಲ್ಯದ ದಿನಗಳು, ತಂದೆಯೊಂದಿಗಿನ ಒಡನಾಟ, ತಾಯಿಯ ವ್ಯಕ್ತಿತ್ವ ಮತ್ತು ಅವರ ಮನೆಯ ಪರಿಸರವನ್ನು ಅತ್ಯಂತ ಆಪ್ತವಾಗಿ ಚಿತ್ರಿಸಿದ್ದಾರೆ. ಈ ಕೃತಿಯಲ್ಲಿ ತಾಯಿ ಲೀಲಾ, ಕಾರಂತರ ವ್ಯಕ್ತಿತ್ವವನ್ನು ರೂಪುಗೊಳ್ಳಲು ಹೇಗೆ ನೆರವಾದರು ಮತ್ತು ಅದಕ್ಕಾಗಿ ಎಷ್ಟು ಶ್ರಮಿಸಿದರು ಎಂಬುದು ಹೃದಯಸ್ಪರ್ಶಿಯಾಗಿ ತೆರೆದುಕೊಂಡಿದೆ.